
蠔殼山
路線
元朗站>凹頭>蠔殼山>掌牛山>井坑山>錦上路站
難度
★★★☆☆
距離
約5.5公里
時間
約3小時
補給
無
交通
起點
元朗港鐵站
終點
錦上路港鐵站
注意事項
沿途樹蔭甚少,注意曝曬
路徑以沙石路為主,注意防滑
路線地圖
路線高度圖表
蠔殼山與附近掌牛山、井坑山及四排石山為九徑山東北山脈的延伸。這一帶山嶺高度約海拔150米至300米不等,不算很高,但由於附近都沒有高山,因此蠔殼山一帶山脈景觀都是非常開揚,可盡覽新界西北部。
難度方面,蠔殼山至井坑山雖然不高,但每個山頭之間都有相當都上落差,而且路徑以沙石路為主,行走上來都不算容易,直到井坑山之前,沿途找一棵樹遮蔭都沒有,夏天行走前務必留意是否合適行走這類超曝曬路線。還好蠔殼山路線只走到井坑山(不走四排石山)的話,路線不長,而且起點終點交通都非常方便,即使是非官方路線路徑及方向都非常清晰,是新界西北一條不俗的短線路線。
元朗西鐵站下車,經YOHO MALL I 接到青山公路元朗段向楊屋村方向行(博愛醫院對面線)
途經楊屋村巴士站
走過東華三院馬振玉紀念中學後,留意右方有明顯山路入口,這便是蠔殼山山徑入口
蠔殼山山徑鋪設極之完善
由山徑入口計,約20分鐘便到達蠔殼山山頂(高海拔149米),山頂築有一座小廟,十分有趣
蠔殼山是360全視線風景,非常開揚
元朗一帶,前方山嶺為九徑山,後方為圓頭山
南生圍一帶,右方山嶺為雞公嶺
錦田一帶,前方山嶺為雞公嶺,後方為大刀刃
之後便沿山徑往掌牛山,蠔殼山至掌牛山一段是行程中高低差最大的一段,而且路徑最全為沙石斜路,行走時會比平時慢及消耗體力,再加上零樹蔭,是行程中最辛苦的一段
掌牛山山頂(高海拔220米),當日用了45分鐘才可由蠔殼山行到掌牛山,烈日當空下,行走當日同行團友都有少許熱衰竭跡象,要大休一番
掌牛山右方有山徑下降到八鄉
如果想走井坑山應向左方電塔方向走
蠔殼山至井坑山一段因距離較短,相對的會比較易行
中途有水泥路往凹頭濾水廠,雖然地圖有顯示這條路徑可穿過濾水廠走到錦上路,但由於凹頭濾水廠一般都會上鎖不開放,因此這條路其實是死路,不要由此路離開
到達井坑山 (高海拔235米),於井坑山看雞公嶺及錦田一帶又有別一番風味
井坑山有左右分岔路選擇,向右(八鄉方向)往四排石山,向左(錦田方向)有山徑往錦上路或大欖轉車站。
到達井坑山後,已經接回官方的大欖涌郊遊徑,路徑都變得好走,但走四排石山最近都要走到大棠才有交通工具,由於交通原因,個人較傾向走左路離開
之後有分支,左方石級往錦上路港鐵站,右方山路往大欖轉車站
可視乎乘塔的交通工具選擇路線,本遊記會下降到錦上路
錦上路段郊遊徑鋪設得美侖美煥,亦有標距柱
走梯級到山腳穿過隧道便到達錦上路結束行程
蠔殼山航拍
Hi.我係上年一個人帶5歲仔仔由烏蛟騰經鎖羅盤行去鹿頸果位媽媽呀。上年我地之前仲行咗元荃古道全段。
尋日年初二,我地行咗 凹頭 > 蠔殼山 > 掌牛山 > 井坑山 > 錦上路。
仔仔依家6歲,相比起成年人仲係好細粒,行呢條路線感覺比起「行山」更似「爬山」,因為80%都係好多浮沙碎石既上落斜,有好多位置對佢黎講都幾高,好多時都要手腳並用。中間有段落斜兩邊係山谷,勁大風,要特別小心。
尋日我地用咗比預計長好多時間完成,9點半開始上山,差不多6點先落到錦上路。我地真係行得好慢,因為安全為上,行得好小心。
上斜我都係小朋友喺前面,我喺後面,佢上一步我上一步,喺後面托住佢。落斜就我行前面,每落一步就指示佢落行山杖同落腳位置。有啲落斜位太高,都要抱佢落去。
我同仔仔都鍾意呢一種要「爬」既山,多過行山徑,佢話好似一齊去冒險。等佢長高啲就再挑戰過+一口氣行埋四排石山,由大棠離開。
多謝你既介紹!
多謝你支持
蠔殼山一帶係非正式行山徑,路況會原始一點
行得慢唔緊要,最緊要安全第一,慢慢享受行山的樂趣
新年快樂,祝大家都身體健康